Ustuvor vazifa — qurilish sifatini ta’minlash

Sifat har doim Enter Engineering kompaniyasining asosiy ustuvor yo‘nalishlaridan biri bo‘lgan va shunday bo‘lib qoladi. Ushbu ishlarni amalga oshirish uchun kompaniyada Nazorat va sifat ta‘minoti (NvaST) departamenti mavjud bo‘lib, uning mutaxassislari loyihalarni amalga oshirishda ishtirok etadilar, qurilishning barcha bosqichlarini tekshiradilar, buyurtmachilar va yetkazib beruvchilar bilan o‘zaro hamkorlik qiladilar, sifat nazorati bo‘yicha shartnoma majburiyatlarining talab va shartlariga rioya etilishini nazorat qiladilar.

Bu misni boyitish fabrikasi (3-MBF) qurilishiga ham to‘liq taalluqlidir, bu yerda NvaST departamentining 30 nafar xodimi loyiha yechimlari va amaldagi qoidalar talablariga muvofiq qurilish-montaj ishlarining (QMI) barcha turlari va bosqichlarini tekshiradi. Bu yerda mahalliy ishchilar bilan birga Qozog‘iston, Rossiya, Hindiston, Filippindan kelgan mutaxassislar yelkama-yelka mehnat qilmoqda. Ularning faoliyati haqida bizga bo‘linma boshlig‘i Quvonchbek Shatiev shunday dedi:

— QMI sifatini nazorat qilishda xodimlarimiz amalda bajarilgan ishlar to‘g‘risida ma’lumot to‘playdi va ularning natijalari obyektning loyihaviy xususiyatlari va muayyan sifat mezonlariga muvofiqligini baholaydi. Ayni paytda 3-MBF loyihasida o‘nlab obyektlar qurilmoqda. Qurilish muhandislari, jumladan, geodeziyachilar bilan yaqin hamkorlikda OKMK buyurtmachilarga xizmat ko‘rsatish bo‘yicha ishlarning bugungi holati to‘g‘risida har kuni elektron shaklda hisobotlar tayyorlab, taqdim etamiz. Keyinchalik, ularning vakillari tegishli tekshiruvdan so‘ng obyektni qabul qiladilar. Vazifalarimiz ko‘p va ular butun sutka davomida hal qilinadi, bugungi kunda barcha qurilish-montaj ishlari aynan shunday rejimda amalga oshirilmoqda.

Guruh xodimlari obyektni qurish uchun ishchi hujjatlarni va barcha ishlab chiqarish jarayonlarining texnologik xaritalarini tayyorlaydilar. Umumiy faoliyat sifatini nazorat qilish barcha bosqichlarda — o‘qlarni geodezik tekislashdan tortib to maydonni obodonlashtirishgacha majburiydir. Xatolarni o‘z vaqtida aniqlash va ularni bartaraf etish obyektni keyingi ekspluatatsiya qilish jarayonida yuzaga kelishi mumkin bo‘lgan jiddiy oqibatlarning oldini olishga yordam beradi.

Boshqa loyihalarda bo‘lgani kabi, bu yerda, 3-MBFda biz qurilishning birinchi kunidanoq ishlayapmiz. Ishlarni bajarish texnologiyalari buzilishi yoki sifatsiz xomashyo kelib tushganligi aniqlangan taqdirda, ularni bartaraf etish va bajarilishini nazorat qilish bo‘yicha mas’ul shaxslarga tegishli taqdimnomalar beramiz. Masalan, bu metall konstruktsiyalar va uskunalarni o‘rnatish sxemalarini to‘g‘ri yig‘ish va payvandlash ishlari tugagandan so‘ng quvur liniyasi segmentlarini to‘g‘ri yotqizish bilan bog‘liq.

Albatta, qisqa maqolada NvaST departamenti xodimlari tomonidan bajarilayotgan vazifalarning barcha jihatlarini aks ettirib bo‘lmaydi, lekin ular har kuni 3-MBF loyihasini amalga oshirishga hissa qo‘shmoqdalar. Ularga mashaqqatli ishlarida muvaffaqiyatlar va ajoyib kayfiyat tilaymiz!