Bolalarga g‘amxo‘rlik bilan

Enter Engineering kasaba uyushma qo‘mitasi har yili kompaniya xodimlari farzandlarining yozgi dam olishi va sog‘lomlashtirilishini tashkil etish bo‘yicha maqsadli ishlarni amalga oshirib keladi.

Kompaniya kasaba uyushma tashkiloti bolalarning jismonan baquvvat, sog‘lom bo‘lib, ta’til kunlarini maroqli o‘tkazishi uchun barcha imkoniyatlarni ishga solmoqda. Joriy yilda kasaba uyushma qo‘mitasi Toshkent viloyatining Bo‘stonliq tumanidagi «Sokol», «Ugam», «Zangori olov» va Qashqadaryo viloyati Shahrisabz tumanidagi «Lochin» bolalar sog‘lomlashtirish oromgohlariga yo‘llanmalar xarid qilishda ko‘maklashdi. Jami 150 million so‘mdan ortiq mablag‘ evaziga 57 ta yo‘llanma ajratildi. Ularning xarajatlari yagona ijtimoiy to‘lov, ota-ona badallari, shuningdek kasaba uyushmasi qo‘mitasi budjeti hisobidan qoplandi.

Sex kasaba uyushmasi qo‘mitalari raislari va faollari loyihalarda bolalarning hordiq chiqarishini tashkil etishda faol ishtirok etib, farzandlarini yozgi oromgohlarga jo‘natish istagida bo‘lgan ishchilarning arizalarini yig‘ishda yordam berdi.

Ta’kidlash joizki, barcha oromgohlar Toshkent va Qashqadaryo viloyatlarining so‘lim tog‘li go‘shalarida joylashgan bo‘lib, bu yerdagi tabiat manzarasi, musaffo havo va ajoyib yashash sharoitlari o‘g‘il-qizlarning vaqtini maroqli va mazmunli o‘tkazish, tetiklik va yaxshi kayfiyat olishiga xizmat qilmoqda.

Oromgoh smenasining har bir kuni qiziqarli voqealar va ajoyib tadbirlarga boy. Madaniy-ko‘ngilochar dasturda turli ko‘rik-tanlovlar, sport musobaqalari o‘rin olgan bo‘lib, qiziqishlar bo‘yicha hunarmandchilik, suratga olish, raqs, vokal to‘garaklari va seksiyalar tashkil etilgan. Bolalar bilan tajribali o‘qituvchi va tarbiyachilar ishladi. Dam oluvchilar uchun muntazam ravishda rang-barang konsertlar, diskotekalar o‘tkazildi, katta ekranda filmlar namoyish etildi. Tinch dam olishni afzal ko‘rganlar uchun kutubxonalar, mutoala zallari va kompyuter sinflari faoliyat yuritdi.

Ishonch bilan aytish mumkinki, Enter Engineering kasaba uyushma qo‘mitasi yordami tufayli kompaniya xodimlarining farzandlari yangi o‘quv yilini tetik va kuchga to‘la holda boshlashadi!