Taom mazali va sog'liq uchun foydali bo'lishi kerak

Enter Engineering kompaniyalar guruhi loyihalarda xodimlar uchun yuqori sifatli yashash sharoitlarini, jumladan kuniga uch mahal issiq ovqat bilan ta’minlashga katta mas’uliyat bilan yondashadi. Bu boradagi ishlarni tashkil etish «Sayohat-travel» mas’uliyati cheklangan jamiyati tomonidan amalga oshirilmoqda.

«Sayohat-travel» MChJ hududiy menejeri Abayev Komil Sobirjanovich bizga kompaniya mutaxassislari Surxondaryo viloyatida qanday ishlashi haqida gapirib berdi.

— Komil Sobirjonovich, xo‘jaligingiz qanday faoliyat yuritishi haqida so‘zlab bering.

— Bizning vazifamiz Enter Engineeringning har bir xodimini sifatli, mazali va kaloriyali taomlar bilan ta’minlashdan iborat. Biz mintaqada joylashgan barcha loyihalarda ishlaymiz, ularning eng kattasi Boysun gazni qayta ishlash zavodidir. Hammasi bo‘lib 10 ta nuqtamiz bor, shundan 5 tasi vaxta shaharchalaridagi statsionar oshxonalar, 5 tasi esa alohida obyektlardagi vaqtinchalik oshxonalar. Shtatda 110 nafar xodim — oshpazlar, oshxona ishchilari va omborchilar ishlaydi. Biz bir vaqtning o‘zida 4500 kishini boqishimiz mumkin.

— Menyu qanday shakllantiriladi, bunda qaysi omillar hisobga olinadi?

— Biz tasdiqlangan menyuni olamiz, unda haftaning kuniga qarab nonushta, tushlik va kechki ovqatlar assortimenti ko‘rsatilgan bo‘ladi. Shuni ta’kidlashni istardimki, u turli xil taomlarni, masalan, palov, gulyash, bo‘tqa, sho‘rvalar, shuningdek, sariyog‘, tuxum va boshqalarni o‘z ichiga oladi. Kundalik ovqatlanishning umumiy ozuqaviy qiymati yil vaqtiga qarab 3000 dan 4200 kaloriyagacha. Biz mahsulotlarni haftasiga ikki marta markazlashtirilgan holda qabul qilamiz va ularning omborda to‘g‘ri saqlanishini ta’minlaymiz. Biz bir kun oldin ovqat tayyorlashni boshlaymiz — har kuni vaxta shaharchasi komendantidan hisobot keladi, unga ko‘ra biz ombordan kerakli mahsulotlarni olamiz va oshpazlar ishga kirishadilar.

— Loyihalarda ko‘plab xorijlik mutaxassislar ishlaydi, ularning istaklari inobatga olinadimi?

— Ha, albatta, Hindiston, Pokiston, Bangladesh va Filippindan kelgan xodimlarga xizmat ko‘rsatadigan ikkita oshxonamiz bor. Bu yerda maxsus tayyorgarlikdan o‘tgan oshpazlar tegishli mahsulotlar va o‘ziga xos ziravorlardan foydalangan holda milliy taomlar tayyorlashadi.

— Tayyorlangan oziq-ovqat sifati nazorati qanday tashkil etilgan?

— Sifat nazorati ustuvor ahamiyatga ega. Har kuni tarqatish boshlanishidan oldin HSE departamentining sog‘liqni saqlash bo‘yicha mutaxassislari idishlardan namuna oladilar, oshxonaning gigiyenik holatini tekshiradilar va tekshirish dalolatnomasini tuzadilar. Faqat shundan so‘ng ovqat stollarga olib boriladi.

«Sayohat-travel» MChJ xodimlariga muvaffaqiyatli va yaxshi kayfiyat tilaymiz!