Ishlab chiqarish uchun 3D texnologiyalar

Enter Engineering kompaniyasining ULTRATEC departamenti o‘z ishining dastlabki kunlaridanoq detallarni yaratish va tiklashda aniqlik hamda tezlikni ta’minlaydigan yuqori texnologiyali jarayonlarga katta e’tibor qaratdi.

Bizning e’tiborimiz 3-MBF loyihasida o‘rnatilgan innovatsion uskunalar: Scantech Mscan-l15, TrackScan Sharp49 va Simscan42 3D skanerlari, shuningdek Scantech AM-DESK 60120 va Scantech AM-CELL C200 robot stantsiyalari bo‘ldi, ular ishlab chiqarish jarayonlarini sezilarli darajada tezlashtirish, sifatini oshirish imkonini berib, murakkab uskunalar uzellarini ta’mirlashga yangi yondashuvni talab qiladi. Yangi jihozlar haqida ULTRATEC departamenti yetakchi muhandis-konstruktori Baxtiyor Xasanov bilan suhbatlashdik.

— Baxtiyor, mana shu uskuna haqida to‘liqroq gapirib bering.

— Keling, 3D skanerlardan boshlaylik. Ularning har biri talab qilinadigan aniqlik darajasiga va obyektning o‘lchamiga qarab aniq vazifalarni bajaradi. Shunday qilib, Mscan-l15 muhandis nuqta shaklida aks ettiruvchi belgilarni joylashtiradigan detallarni qayta ishlash uchun fotogrammetriyadan foydalanadi. Ushbu texnologiya ularning makondagi joylashuvi haqida juda aniq ma’lumotlarni taqdim etadi. Konstruktorlar olingan ma’lumotlardan Simscan42 yordamida aniqroq natijalarga erishish uchun foydalanadilar. TrackScan Sharp49 yordamida biz mahsulotlarga marker qo‘ymasdan ko‘rsatkichlarni olishimiz mumkin, chunki tizimda 3D treker mavjud. Ushbu model bizga katta detallarni, masalan, poyezd vagonining o‘lchamini skanerlash imkonini beradi.

— Robot stantsiyalar nima uchun mo‘ljallangan?

— Bu turli oʻlchamdagi skanerlanuvchi obyektlar uchun ikkita robot-qoʻl. Nomidan taxmin qilganingizdek, ular avtomatik ravishda detal o‘lchamlarini oladi. Ulardan birida SimScan, ikkinchisida TrackScan o‘rnatilgan. Kichkina robot qo‘lning ish stoli og‘irligi 75 kg gacha, kattasi esa yarim tonnagacha bo‘lgan detallarni ko‘tarish uchun mo‘ljallangan. Stansiyalar skanerlash jarayonida detallarni tahlil qilish va aylantirish imkoniyatiga ega, ammo har bir obyekt uchun qurilmaning tegishli trayektoriyasini o‘rnatadigan alohida dastur yozish kerak bo‘ladi. Shuning uchun, bu asbob-uskunalar kamdan-kam hollarda bitta-bitta mahsulotlar uchun ishlatiladi, biz odatda ulardan ommaviy ishlab chiqarishda foydalanamiz. Bundan tashqari, ushbu robot tekshirish tizimi o‘lchovlarni yuqori aniqlik bilan tekshirish, nuqsonlarni aniqlash va butun partiya bo‘yicha batafsil hisobotlarni taqdim etish orqali metrologiya bo‘limining o‘rnini bosadi.

— Skanerlar o‘z ishini bajarib bo‘lgach, nima bo‘ladi?

— Skanerlar mustaqil ravishda 3D modelni yaratishga qodir emas, ular yuzadan barcha oʻlchamlarni olish va ularni faylga kiritish uchun lazer nurlaridan foydalanadilar. Ushbu fayl kompyuterga o‘tkaziladi, shundan so‘ng konstruktor olingan ma’lumotlarni Geomagic Design X dasturida qayta ishlashni boshlaydi, undan chizmalar bajarilishi yoki RDB dastgohlarida detallarni ishlab chiqarish uchun ishlatilishi mumkin bo‘lgan mustahkam model yaratadi.